الرئيسية / توب / حَمَار وحلاوة وترطب فى الصيف.. 7 خطوات عشان تختارى البطيخة الصح

حَمَار وحلاوة وترطب فى الصيف.. 7 خطوات عشان تختارى البطيخة الصح

أول حاجة بتيجى فى بالنا لما بيدخل فصل الصيف هى الفاكهة وخصوصا البطيخ، مين فيكم مش بيحب البطيخ؟ مين ما أكلش جبنة وبطيخ على العشا فى يوم من أيام الحر فى الصيف؟ أكيد مفيش حد هيقول أنا، لأن البطيخ صنف حاضر دايمًا فى بيوتنا كلنا فى الصيف، وطالما بتحب أو بتحبى  البطيخ قوى كده، يا ترى عارفة يا ست الكل إزاى تختارى البطيخة الحمرا؟ لو عايزة تعرفى هنقولك على الطريقة علشان ما يتضحكش عليكى.

أول خطوة يا هانم:

لو عايزة تشترى بطيخ اشتريه فى الفترة من نص شهر يونيو لغاية آخر شهر أغسطس.

تانى حاجة:

خبطى على البطيخة بأطراف صوابعك، لو سمعتى صوت تبقى البطيخة حلوة، وبالتالى اتكلى على الله واشترى.

بطيخ 2

بعد كده بقى:

اختارى البطيخة اللى لونها أخضر، وابعدى تمامًا عن اللى لونها باهت، لأن بَهَتان اللون دليل على إنها متخزّنة بقالها كتير.

رابع حاجة:

دوسى على قشرة البطيخة، لو لقيى إنها طريّة شوية تبقى حلوة، وعلى فكرة كمان، لازم يكون لون القشرة بيلمع مش مطفى.

وما تنسيش برضه:

لازم تختارى البطيخة اللى جدرها أخضر ولسّه ما نشفش، لأن ده معناه إنها لسّه طازة، ولازم تكون فيها بقعة واحدة لونها أصفر مش أبيض، لأن اللى فيها أكتر من بقعة تبقى اتعرضت للشمس فترة طويلة وممكن تكون باظت.

بطيخ 1

سادس خطوة يا ست الكل:

دوسى على البطيخة بإيدك من كل ناحية، لو فيها حتّه طريّة تبقى بايظة، لازم تختارى البطيخة الناشفة لأنها لو طرية تبقى متخزّنة بقالها كتير، وأكيد مش هتبقى بطيخة حلوة.

وفى الآخر بقى:

اختارى البطيخة المدورة، وابعدى خالص خالص عن “المبعجرة” لا مؤاخذة، ولازم تكون البطيخة تقيلة مش خفيفة، وده طبعًا بالنسبة لحجمها، وبالهنا والشفا.

موضوعات متعلقة :

أنعشى أطفالك بعصير البطيخ والشمام فى بداية فصل الصيف

طريقة عمل ميلك شيك البطيخ بوصفة صحية ومنعشة

4 تعليقات

  1. بعد لفظ مبعجرة ده صرفت فكرة عن أكل البطيخ ده خالص 😀

  2. مش شايفين ان رابعا متعارضه مع سادسا

  3. جمال ابوالسعود

    شكرا علي النصائح الغالية

  4. ميرسي كتير

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *